| 
  • If you are citizen of an European Union member nation, you may not use this service unless you are at least 16 years old.

  • Stop wasting time looking for files and revisions. Connect your Gmail, DriveDropbox, and Slack accounts and in less than 2 minutes, Dokkio will automatically organize all your file attachments. Learn more and claim your free account.

View
 

Suplement al Kosmoglott 5

Page history last edited by Dave MacLeod 8 months, 2 weeks ago

#SUPLEMENT AL KOSMOGLOTT

 

## PARTE SCIENTIC-LITTERARI

 

## IN OCCIDENTAL)

 

## Nr. 5 1926

 

###Exemples de Modellic Prosa.

 

###Li reva pri li eternitá.

 

Trad. de "Drömmen om evigheten" de Hjalmar Söderberg, *) Stockholm.

 

(* Un del max bon vivent sved stilistes)

 

Ex li sved de A.Z.R.

 

Quande yo esset ancor tre yun, yo credet con absolut certitá, que yo have un anim ínmortal. Yo estimat to quam un sanct e valorosi donation, e yo esset felici e fieri pro ti.

 

Sovente yo dit a me self:

 

"Ti vive, quel yo vive, es un obscur e confuset reva. Unvez yo va avigilar me in un altri reva, quel sta plu proxim al realitá e have plu profund signification quam ti-ci. Ex ti reva yo va avigilar me in un triesim e poy in un quaresim, e chascun reva sta plu proxim al veritá quam li anteyan. Ti aproximation al veritá constitue li signification del vive, e it es plen de sensu e profund."

 

E gay ye saver, que yo possedet in mi ínmortal anim un capitale, quel ne posset esser perdit in ludes e ne esser confiscat pro debes, yo vivet un vive debochant e yo prodigat quam un prince to quo yo possedet e quo yo ne possedet.

 

Ma un vésper yo esset con quelc de mi companos in un grand sala, quel brilliat de aure e electric luce,  e ex li fendes del planc-suol ascendet un odore de putrition. Du yun puellas con pictet facies e un old fémina con rugas plenat per gips dansa ta sur un tribune acompaniat del tintinnada del orchestre, li aprobant crias del mannes e li son de ruptet glasses.

 

Noi regardat ti féminas, trincat mult e conversat pri ínmortalitá del anim.

 

"Es foll creder", un de mi companos dit, qui esset plu old quam yo, "que it vell esser un felicie posseder un anim ínmortal. Ples regardar ti-ci old feminacha, qui dansa ta e de qui li cap e manus treme, quande ella sta sin move durant un moment. On vide vide strax, que ella es impertinent e deformi e absolut sin valore, e que ella deveni tal plu e plu per chascun die. Quam comic vell esser li pensa, que ella vell haver un anim ínmortal! Ma to concerne in li sam mode tu e yo e noi omnis. Qual mal joca it vell esser donar nos eternitá!"

 

"Quo desplese me max mult in to quo tu di", yo respondet, "ne es to, que tu nega li ínmortalitá del anim, ma to, que tu trova plesura in negar it. Li homes similea infantes, queles lude in un jardin, gardat de un alt mur. Vez pos vez un porta es apertet in li mur e un del infantes desapari tra ti porta. Tande on di al altris, que il es ductet for in un altri jardin, quel es plu grand e plu bell quam ti. Tande ili audi durant un moment in silentie, e depoy ili continua su lude inter li flores. Ples suposir nu, que un del púeres es plu inquisitiv quam li altris e grimpa sur li mur por saver, u li camarades ha desaparit. E quande il descende, il raconta al altris, quo il ha videt: ante li porta sede un gigante, il manja li infantes, queles on ducte for. E ili omnis deve esser ductet tra li porta, chascun in su órdine. Tu es ti púer, e yo trova it índescribilmen risibil, que tu raconta quo tu crede que tu ha videt, ne plen de desesperantie ma fieri e gay pro saver plu quam li altris."

 

###Li responsabilitá del printat parol.

 

Ex "Blad ur min tänkebok" de Z. Topelius.

 

Li pensa sedet silent in su solitari monasterial celle, it devenit fatigat pri se self, it exeat e trovat li parol. Li parol devenit li córpor del pensa, it devenit action e creat li munde.

 

Li parol esset un evanescent son, it serchat un firm punctu e trovat li scritura. Li scritura preservat li parol, ma esset ligat che su folie, it serchat ales e trovat li print-presse. Ex li vidpunctu de comunication li parol es li eruca del pensa, li scritura es su cocon, li print-presse es su performat papilion. Ti-ci tri formas de developation divide li historie del munde. (*)

 

In chascun de ti tri formes li responsabilitá del pensa cresce con su potentie. Deo sol judica un pensa sin paroles. Li parlat parol es judicat secun li testimonie del atestantes, li scrit testimonia se self, li printat sta avan li tribunal de omnis. Nam li parlat e scrit parol es conversation con poc homes, li printat es conversation con li munde.

 

Por li printat parol ne existe límites in témpore o spacie. It trova su via partú, it penetra omni portas e fendes. Un vez emisset, it es ínobtenibil per homan potentie. Batte it per un baston: batte li aer! Combuste it in foy: combuste li pensa! Li censura es un follie, ne existe un altri barra contra li printat parol quam anihilar omni arte de leer. Ma anc ti barra va esser ruptet, nam si un popul vell esser felicimen reductet til li nesaventie del savagies, támen sempre va exister un dervish, qui deciffra li lítteres.   Trad. A.Z.R.

 

Rem. de Red.  In li modern Radio it ha atinget su quaresim transformation, liberante se del materie, del papere a quel it ha esset ligat, denov deveniente son, ma son audibil ancor plu ínvoluntarimen, quam leibil in li presse.

 

 

##EDITIONES DE KOSMOGLOTT.

 

Curt grammatica-claves de Occidental in lingues anglés, tchec, francés, german, russ a 0,25 frv.

 

Radicarium de Occidental in 8 lingues ADFIPRSSV 5 fr. sv. in landes de bass valuta rabatte til 100%.

 

Anteyan annu-colectiones de Kosmoglott 2-4 frs. sv.

 

Jacob Linzbach, Transcendent Algebra, scrit in Occid. 1 fr. sv.

 

Rabindranath Thakur (Tagore). Nationalisme in Occidente. Autorisat traduction de A. Toman. Precie 1 fr. sv.

 

Li Paneuropan Manifeste de Dr. Coudenhouve-Kalergi, traductet de E. Moess.

 

Comensa aparir in liverationes a 0.25 frs. sv.

 

Lexico German-Occidental de Joseph Gär.

 

Printería A. Elken, Reval, Estonia, Varblase 5

Comments (0)

You don't have permission to comment on this page.