# COSMOGLOTTA

## ORGAN OFICIAL DEL INTERLINGUE-UNION

**Redaction**: Interlingue-Institute, CHESEAUX s/Lausanne, Svissia

**Administration**: Interlingue-Centrale, ST. GALLEN 7, Svissia

**Abonnament annual**: 1 ex.: sviss Fr. 5.-, 3 ex.: Fr. 9.-, 5 ex.: Fr. 13.-.

34-im annu -- Januar-Februar 1955 -- Nró 184

CONTENETE: -- **K. Hamburger**: Li decision de UNESCO. -- Opinion de prof. A. Sauvageot. -- **L.B.**: Li 190 000 paroles del lingue anglesi. -- **Guillaume Apollinaire**: Un terribil aventura. -- **A. Matejka**: Un servitor misconosset: vor horloge. -- **Cronica. -- F.L.**: Articules por Cosmoglotta.

## K. Hamburger - LI DECISION DE UNESCO

Noi ja ha raportat pri li facte que li General Director de UNESCO ne ha previdet particulari activitás concernent Esperanto in li projecte del proxim programma, proque li membre-states hat rejectet li original petition del UEA, quel desirat que "li Unit Nationes mey auxiliar in omni manieres por difuser li usation de ti lingue". Li nov resolution, presentat al 8-im General Reunion de UNESCO in Montevideo dunc ne plu posset ligar li UNESCO self in li afere, ma vice to nu demandat que "li General Reunion recomanda al membre-states incoragear li difusion de Esperanto secun li metodes, queles ili va judicar convenent". Li tache, quel li UNESCO hat refusat executer self, esset dunc transferet simplicmen al singul membre-states. Li decision pri ti resolution evenit li 4 decembre 1954 in li comission del programma. In li votation esset 3 votes in favor del resolution (Mexico, Uruguay, China), 23 esset contra e 19 esset abstentiones (li oficial protocolles ne ancor essente disponibil, noi seque ci li indicationes liverat del Esperantistes self in lor oficial organ, malgré que altri seriosi informationes parla de *null* vote, o de solmen un, in favor del resolution). Per ti votation Esperanto dunc recoltat un duesim clar e ínmiscomprensibil fiasco che UNESCO.