E. Biddle
La Via de Progress Individual
La Via de Progress
Individual.
Omni hom in ti ci munde deve sive progresser sive regresser. Ne es possibil restar long in sam loc. Tis qui ne evolue, regresse. It es un ley natural.
Noi changea constantmen – omni annu, omni mensu, omni die, mem omni hora. Nor circumage influe nos, nor actiones e super omnicos – nor pensas!
Mult secules ante nu, esset dit: quam un hom pensa in su cordie, tal il es, e hodie noi comensa comprender quam profundmen ver es ti old ditura.
Mersí al scientic descovritiones del psychologos, noi save que li pensa es un factor potentissim in nostri vives. Desde li infantie til li morte, noi senti li influentue del pensa quel fabrica nor characteres, nor capabilitás, nor sanitá, nor vispunctu, tre sovent nor maladies, nor success o ínsuccess.
Noi ha apprendet que ultra li ordinari, conscient mente existe alquo plu - un vast, partmen ínexplorat, region del mente quel noi nómina Subconscient. Existe anc mult indicationes de alquo mem plu astonant – de un region de supernormal potenties, rarmen sentit del max mult homes, ma ne minu real pro ti fact.
In li Subconscient resta li memorie pri omnicos quo noi ha experientiat, fat, leet o audit; pri omni nor pensas – bon o mal; pri omni nor emotiones – ne de un annu, ma ne nor tot vive. Conscientmen noi ha obliviat mult; subconscientmen, omnicos es preservat, quam noi vide in hypnotism e altri ínnormal mental conditiones.
Nor character in li actual moment es li resulta de nor actiones e pensas in li passat; noi es responsibil por it, nam es noi qui ha forgeat it ex nor reactiones al circumage. In omni direction, - nor vertus e nor vicies, nor fortitá o nor debilitá, nor capabilitá o íncapabilitá in quelcunc affere -noi es to quo nor dominant types de pensas ha fat nos.
Mult vezes eveni que noi ne reconosse li ver origin de nor actiones. Noi imagina un rason (per un procede quel psychologos nómina rationalisation), generalmen un rason quel ne vúlnera nor fieritá, e ne suspecte li ver subconscient origin del action. Sovent, noi ha represset un idé quel esset desagreabil a nos, refusat agnoscer it, talmen que it deve atinar li conscientie in un form alterat e plu acceptabil, symbolisat til ínreconossibilitá.
Pro que noi ne posse destructer nul memorie, on vell forsan pensar que it ne existe esperantie changear nostri characteres. Tamen to vell changear to quo ja existe, ma noi posse crear pensas de un nov e opposit type e persister con illi til que illi es plu fort quam li oldis e talmen crear un nov dominant. In ti ci brochur, yo va monstrar qualmen on posse far to, per li conscient control del Subconscient.
Li Subconscient have un tre important characterisation. It ne posse criticar to quo atine it. Omni pensa, omni idé quel on impresse sur it es acceptet e ductet con miraculosi precision a su logical conclusion. Ergo, si un idé posse evitar li dúbitas e critica del conscient mente e atiner li subconscient, it va esser acceptet e realisat plu o minu rapidmen secun li fortie del old idé quel on vole modificar.
Li metode quel deve adopter es li Auto Suggestion, to es li systematic impression sub li subconscient de idés conscientmen electet.
Yo peti vos atender un moment, - e realisar quelc del multissim directiones in queles on posse utilisar li auto-suggestion. Inter mult altris: Control del Nerves, Self-Confidentie, Concentration, Memorie, Persevantie, Self-Control, Control del Pensas, Patientie Optimism, Felicitá.
Tamen on deve saver qualmen practicar li suggestion. Si on secue li facil e simplic regules, li success es cert. Ci yo scri con autoritá, nam yo ha pruvat per mi propri experientie que to quo yo di es ver. Bentost, anc vu va pruvar lu sam e vu anc va saver. Yo peti vor fide in li comensa; li metode, ples memorar, es scientific, do digni de vor fide.
Existe cert conditiones in queles li conscient mente es relativmen quiet. Tande es plu facil influer li subconscient. Lass nos considerar ti conditiones.
In ti témpore quande noi semi-dormi, e quande noi es semi-revigilant, li subconscient es plu accessibil quam durant li die, do noi posse practicar li suggestion tande.
Tamen, noi posse, sin mult desfacilitá, crear artificialmen un apt state mental. Unésimli, noi deve aprender qualmen noi relaxar nos. Yo posse dir que ti ci exercitie es extrem valorosi in se self, nam li relaxation de témpore a témpore es tre necessi si noi vole reposar:
Ci es li simplic exercitie:
Lassa les jacer ú illi es.
Resta in ti ci position durant quin o deci minutes.
Nu noi posse considerar li suggestion.
Li essentie del successosi sugestion es li absentie de effortie, nam, secun un ley formulat del famosi francés scientist Emile Coué, quande li volentie e li imagination es in conflict, li imagination sempre victe. Noi omni conosse casus ú un hom ha vanmen provat victer un mal tendentie trova se in li subconscient, ni qualmen on deve influer li subconscient. Li max bon resultas es atinibil ne per combatte, ma per li usation del imagination, per li creation de nov mental images, per li suggestion, quo, in su propri sfere, es presc omnipotent.
Yo supposi que vu ha apprendet relaxar vos e practicat ti exercitie. Quande vor mente es tranquil, repeti – sin effortie – li suggestion electet. Probabilmen vu va trovar que altri pensas veni en vor mente. Ne importa. Illi va desapparir. Persiste tranquilmen.
Es un excellent idé, pos un poc de práctica, permitter que li imagination constructe mental images del desirat amelioration. Vu va trovar que bentost vu posse vivificar les con un cert quantité de emotional sentiment. Ma memora, sempre memora, que vu deve far to sin effortie, sin un sense de conflict! Pos un curt témpore, it va esser sufficent facil.
Li cardinal afferes es: regularitá, fide e patientie. Con tis ci, vu ne posse ne victer.
Comensa per decider pri li directiones in queles vu vole utilisar li suggestion. Si vu have un mal tendentie quel es fortmen inradicat, es plu bon comensar per alquo plu facil, por ganar experientie in li metode e per un relativmen facil success, ganar li fide quel es tam important.
Nu – adavan! Esse un individue e developa vos secun vor propri capabilitás e inclinationes. Ne esse content simplicmen secuer li turbe, far to quo omnis fa. Ne time esser original, asserter vor individualitá – ne in un egoistic sense, ma realisante que solmen per li maxim grand developation de vos self, vu posse satisfatorimen auxiliar altris.
Yo da quelc specimenes de suggestiones de divers types. Comprensibilmen, omni person deve preparar su propri suggestiones secun su propri besonas, ma sin dúbita, tis queles yo da va esser util quam illustrationes.
1. - Coragie
Yo es fort, sin timore e positiv.
Null debilisant influentie posse tuchar me.
Yo time necos. Nequi posse influer me contra mi volentie.
Yo have fide in yo self.
Mi self-confidentie cresce omni die.
Yo posse, proque yo pensa que yo posse.
Yo pensa success, yo vive success, YO ES success.
2.- Sanitá
Omni die, in omni maniere, yo deveni melior e melior.
Yo es plen de activitá e energie.
Yo refusa discusser e propagar pensas de maladies.
Yo es fort e san; maladies ne posse tuchar me.
Li pensa es un fortie creativ; yo utilisa it omni die.
Yo es mastro de yo self.
3. Control de Pensas
Yo accepta solmen pensas queles auxilia e refusa omni altris.
Li pensa es un fortie creativ; yo utilisa it omni die.
Yo es mastro de yo self.
(E. Biddle: La Via de Progres Individual. Editoria Novi Vive. Chester, Anglia 1932)